Mr & Miss Sikpuiruoi 2011Tv. Lalramsan Tusing le Nk. Angelyn Lalsangzuol Puruolte

Sikpuiruoi 2011 chu ei beisei ang ngeiin ei lo hmang zo tah. Kum dang dang emin mi tamtak fe khawm theinaw inla khawm inhawi ei ti tlang hel ni sien a hawi.

Tukum ei sikpuiruoi hmanga event hieng ang hin tawite in hei tarlang ei tih. Comperes Tv. Zolienkhum Zote le Nk. Maryjones haiin hnesaw takin function an mi thuoi a.

A hmasatakah Pi Dari Lungtau in hun hawngna tawngtain a anei a, a zoah President Tv. Randolph Amaw in fe khawmhai lawmlutna thucha hrilna a nei bawk. Hi zo hin tukum a ei project Sound System thar hlawk inhlanna Pi Sangzel Amaw in a nei bawk a nih.

Pu Robert Sungte in sikpuipa nina mi chang pekin thuhrilna hai a nei bawk a nih. HSA a inthawk khawmin chawimawin thilpek Thangsuopuon le Memento pek a ni bawk anih.

Cultural group haia inthawkin cultural dance chi hran hran chawkpawl (sikpui lam, chawn lam le tangkawng lam hai) suklangna nei a ni bawk. Hmu nuom a umin an thiem hle.

Hi zo hin sports a lawmman dawnghai lawmman semna hunser nei a ni a, lucky draw hai khawm draw a ni bawk.

A zo hin Choreography (Sawrtui Nunghak) haia inthawk in hmunuom um takin an hung lam  bawk.

Huser tawpna taka Sikpui Mr le MIss inthalngna nei a ni a, hi hun a hin Bangalore a Hmar sunga chawimawi tlaka nunghak le tlangval ei ngai hai thenkhat thlang dawng an ni a. Anni lai hin mipuiin Tv. Lalramsan Tusing le Nk. Angelyn Lalsangzuol Puruolte hai chu an lo thlangtling tah anih.

Hun kharna le mr/miss lawmpuina dingin “I mawi ngei” ti hla Nk. Mercy Lalrokhawl in thiem em em in a hung sak a. Mipui fekhawm hai khawm inchhei rawk rawk in hlim takin kut insuiin an lam khawm mup mup bawk anih.

A tawpna taka dingin Pu Nelson Songate in hunkharna le ruoi inhlanna neiin hun a khar a nih.

Tin hin ruoi kil tlang ani bawk anih.